Сара Мыңжасарованың 100 жылдығына арналған ғылыми тәжірибелік форум

2024 жылдың 4 желтоқсан күні «Тұран» университеті Медиа және мәдениетаралық коммуникация Жоғары мектебінде жазушы, публицист Сара Мыңжасарованың 100 жылдығына орай «Білім мен ғылым және қазіргі массмедианың өзекті мәселелері» атты республикалық ғылыми-тәжірибелік дөңгелек үстел өтті. Іс-шараға Қазақстанның өңірлері мен Астана, Алматы қалаларынан белгілі ғалымдар қатысты.

Жиынды «Тұран» университетінің Стратегиялық даму, ғылым және инновациялар жөніндегі проректоры, экономика ғылымдарының кандидаты, PhD докторы Разакова Дина Ибрагимқызы ашып, Жазушылар Одағының төрағасы орынбасары, филология ғылымдарының докторы, профессор, ҰҒА академигі, «Қазақ әдебиеті» газетінің бас редакторы Бауыржан Жақып Сара Мыңжасарованың жазушылық-публицистикалық еңбектері туралы маңызды сөз сөйледі.

М.Әуезов атындағы Әдебиет және өнер институты бөлім басшысы, филология ғылымдарының докторы, профессор Орда Гүлжахан жазушы романдарының көркем қырларына тоқталды. Жазушы-публицист Мағира Қожахмет, А.Құсайынов атындағы Еуразия гуманитарлық институтының проректоры, т.ғ.д., профессор Қадыр Ахметов, ақын Сейфолла Оспанов, жазушы-публицист Бейбіт Қойшыбай т.б. Сара Мыңжасарованың шығармашылығы туралы жан-жақты мазмұнды талдау жасады.

Осы іс-шарада «Сара Мыңжасарова» атты «Тұран» университеті журналистика мамандығының 2 курс студенттерінің түсірген деректі фильмінің көрсетілімі болды.