Мырза Маурицио Арониканың «Тұран» университетіне сапары және Алматыдағы Кулинария академиясының ашылуы
2025 жылдың 3 желтоқсанында «Тұран» университеті БҰҰ Тұрақты даму мақсаттары қорының (FFUN SDG) президенті мырза Маурицио Арониканы ресми сапармен қабылдады. FFUN SDG – БҰҰ-ның 2030 күн тәртібі мен 17 Тұрақты даму мақсатын ілгерілететін халықаралық ұйым. Сапар Алматыда жоспарланған Кулинария академиясының салтанатты ашылуына арналған іс-шара аясында өтті. Академия гастрономия және тұрақты даму саласында жаңа білім беру алаңына айналмақ.
Кездесу барысында мырза Маурицио Ароника тұрақты даму қағидаттарына негізделген білім беру және әлеуметтік бастамаларды дамытудың маңыздылығын атап өтіп, Қазақстанның жаһандық жобаларға белсенді қатысуына жоғары баға берді.
Тараптар ұзақ мерзімді серіктестіктің стратегиясын және ынтымақтастық бағыттарын талқылады, олардың ішінде:
- халықаралық академиялық ұтқырлықты күшейтетін қос диплом бағдарламасын қоса алғанда, білім беру және ғылыми жобаларды дамыту;
- тұрақты туризмді ілгерілету;
- әлеуметтік әсері бар бастамаларды енгізу және Тұрақты даму мақсаттарын оқу процесіне интеграциялау.
Алматыдағы жаңа Кулинария академиясы тұрақты тамақтану, гастрономиялық мәдениет және заманауи кулинарлық технологиялар бойынша құзыреттерді қалыптастыруға бағытталған инновациялық білім беру платформасы болмақ.
«Тұран» университеті Қазақстанның әлемдік білім кеңістігін интеграциялануына және тұрақты даму қағидаттарын ілгерілетуге ықпал ететін жобаларды жүзеге асыра отырып, халықаралық ұйымдармен ынтымақтастықты жалғастырады.
