«Тұран» университетінің Құқық жоғары мектебінде конституциялық реформа мәселелері бойынша дөңгелек үстел өтті

2026 жылғы 19 ақпанда «Тұран» университетінің Құқық жоғары мектебінде «Конституциялық реформа: конституциялық дамудың мәселелері мен перспективалары» тақырыбында дөңгелек үстел өтті. Іс-шараны «Тұран» университетінің Құқық жоғары мектебі, «Тұран» университеті жанындағы Құқық ғылыми-зерттеу институты, Caspian University жанындағы Жария құқық ғылыми-зерттеу институты, сондай-ақ Қазақстан Республикасының Заңнама және құқықтық ақпарат институты ұйымдастырды. Отырыс барысында қатысушылар конституциялық заңнаманы жетілдірудің өзекті мәселелерін, мемлекеттік және құқықтық жүйені реформалаудың негізгі бағыттарын, сондай-ақ Қазақстан Республикасының қазіргі даму кезеңі контексіндегі институционалдық өзгерістерді талқылады. Конституциялық жаңашылдықтарды іске асырудың практикалық аспектілеріне және олардың құқық қолдану практикасына ықпалына ерекше назар аударылды. Дөңгелек үстел ғылыми қауымдастық өкілдерін, конституциялық құқық саласының сарапшыларын, тәжірибелі заңгерлерді және білім алушыларды біріктіріп, кәсіби диалог пен пікір алмасуға тиімді алаңға айналды.