ҚР ҒЖБМ ҒК гранттық қаржыландыру жобасы AP26198511 «Орталық Азия аймағындағы креативті индустрияның интеграциялық әлеуеті: бағалау әдіснамасы мен іске асыру тетіктерін дамыту» жобасының зерттеу тобы ғылыми іссапар аясында Әзербайжан Республикасында болды
2026 жылғы 19–26 мамыр аралығында «Тұран» университетінің зерттеу тобы AP26198511 «Орталық Азия аймағындағы креативті индустрияның интеграциялық әлеуеті: бағалау әдіснамасы мен іске асыру тетіктерін дамыту» жобасын жүзеге асыру аясында Баку және Хырдалан қалаларында (Әзербайжан Республикасы) ғылыми іссапарда болды. Іссапардың мақсаты — X International Scientific Conference of Young Researchers халықаралық ғылыми конференциясында зерттеу нәтижелерін апробациялау, сондай-ақ Әзербайжанның сарапшылық қауымдастығы өкілдерімен тәжірибе алмасу арқылы зерттеу базасын кеңейту және толықтыру болды.
Зерттеу тобының құрамына «Тұран» университеті Экономика және менеджмент жоғары мектебінің бас ғылыми қызметкері, э.ғ.д., профессор Сансызбаев Серік Нұрымұлы, аға ғылыми қызметкер, Creative Kazakhstan Agency директоры Мараткызы Айгүл, сондай-ақ кіші ғылыми қызметкер, «Экономика» білім беру бағдарламасының 3-курс докторанты Ялкунов Махамятали Умутжанович кірді.
Ғылыми іссапар аясында жоба өкілдері БҰҰ-Хабитат аясында ұйымдастырылған он үшінші Дүниежүзілік урбанистикалық форумға — World Urban Forum 13 (WUF13) қатысты. Форум барысында тұрақты урбанизация, қалаларды басқарудың инклюзивті тетіктерін дамыту, сондай-ақ қазіргі қалалық экожүйелерді дамытудағы мәдениет пен креативті экономиканың рөлі мәселелеріне ерекше назар аударылды.
Зерттеу тобы сондай-ақ UNESCO Creative Cities Network (UCCN) Секретариаты мен Әзербайжан Республикасы Мәдениет министрлігі ONE UN бастамасы аясында бірлесіп ұйымдастырған ЮНЕСКО-ның Шығармашылық қалалар желісінің (UNESCO Creative Cities Network — UCCN) мамандандырылған панельдік сессиясына қатысты. Сессия тақырыбы мәдениет пен креативтілікті қалалық даму, тұрғын үй құрылысы және урбандалған аумақтарды регенерациялау саясатына интеграциялауға арналды. Пікірталастар барысында қалалық кеңістіктерді трансформациялау және креативті қауымдастықтарды дамытуға байланысты сын-қатерлер қарастырылды.
Сессия спикерлері қатарында Әзербайжан Республикасы Мәдениет министрінің орынбасары Саадат Юсифова, Әзербайжан кинематография агенттігінің басшысы Рашад Азизов, Бұхара қаласы әкімінің орынбасары Шарофиддин Хусенов, БҰҰ-Хабитат сарапшысы Хосе Чонг, сәулетші және урбанист Ана Луиза Оттерсбах, сондай-ақ Сараево киноакадемиясының профессоры Миа Авдагич болды.
Форум аясында зерттеу тобы Әзербайжан Республикасының мәдени және креативті сектор өкілдерімен кәсіби консультациялар мен сарапшылық кездесулер өткізді. Әзербайжанның креативті индустриялар экожүйесінің қазіргі жағдайы, мемлекеттік қолдау тетіктері және секторды дамытудың стратегиялық бағыттары туралы ақпарат ұсынған Рашад Азизовпен кездесу ерекше маңызға ие болды.
Әзербайжан Республикасы Мәдениет министрлігі жанындағы YARADICI мәдени және креативті индустрияларды дамыту орталығының басшылығымен жұмыс кездесуі өтті. Кездесуге орталық директоры Рашад Сапаров, куратор Вугар Алиев, сондай-ақ GamePons GameDev-компаниясының директоры Вусал Каримли қатысты.
2026 жылғы 21 мамырда жоба тобы Бакудегі Гейдар Әлиев орталығында өткен Экономика және менеджмент саласындағы зерттеушілердің VIII халықаралық ғылыми конференциясына (ISCEMR) қатысты. Конференцияны Әзербайжан мемлекеттік экономика университеті ұйымдастырды. Конференция тақырыбы: «Жасанды интеллект және шағын мемлекеттердің стратегиялық шешімдері». Пленарлық және тақырыптық сессиялар аясында экономиканы цифрландыру, мемлекеттік басқаруда AI-технологияларды қолдану, еңбек нарығын трансформациялау, инновациялық саясат және тұрақты даму мәселелері талқыланды.
2026 жылғы 22–23 мамыр аралығында жоба өкілдері Әзербайжан Республикасының жалпыұлттық көшбасшысы Гейдар Әлиевтің туғанына 103 жыл толуына арналған Жас зерттеушілердің X халықаралық ғылыми конференциясына қатысты. Конференцияны Баку инженерлік университеті ұйымдастырды және әлемнің түрлі елдерінен келген жас зерттеушілер үшін халықаралық академиялық платформаны қалыптастыруға бағытталды.
Ресми ашылу рәсімі барысында профессор Сансызбаев Серік Нұрымұлы Қазақстан Республикасының ғылыми қауымдастығы атынан құттықтау сөз сөйлеп, халықаралық академиялық өзара іс-қимылдың және Орталық Азия университеттері мен Әзербайжан Республикасы арасындағы ынтымақтастықты кеңейтудің маңыздылығын атап өтті.
Конференцияның ғылыми бағдарламасы аясында жобаның жас зерттеушісі Ялкунов Махамятали Умутжанович «Creative ecosystems as drivers of sustainable socio-economic transformation: the case of Kazakhstan» тақырыбында ғылыми баяндама жасады. Баяндама қорытындысы бойынша зерттеуші халықаралық конференция қатысушысының сертификатын алды. Іс-шараға қатысу зерттеудің аралық нәтижелерін апробациялауға, сараптамалық кері байланыс алуға, сондай-ақ халықаралық академиялық және ғылыми-кәсіби байланыстарды кеңейтуге мүмкіндік берді.
Конференция барысында Баку инженерлік университетінің өкілдері Хамзага Оруджов Давуд және Агаси Маликов Зарбали мырзалармен жұмыс кездесулері өткізілді. Келіссөздер қорытындысы бойынша зерттеу тобы 2027 жылғы сәуірге жоспарланған инженерлік міндеттерді шешудегі басқару және бақылау жөніндегі халықаралық конференцияға қатысуға ресми шақыру алды.
Өткізілген ғылыми іссапар AP26198511 «Орталық Азия аймағындағы креативті индустрияның интеграциялық әлеуеті: бағалау әдіснамасы мен іске асыру тетіктерін дамыту» жобасының міндеттерін жүзеге асыруға ықпал етті. Конференция барысында алынған материалдар, кәсіби талқылау нәтижелері, сарапшылық ұсынымдар және орнатылған академиялық байланыстар Орталық Азияның креативті индустрияларының интеграциялық үдерістері мен даму әлеуетін зерттеуге бағытталған кейінгі ғылыми-зерттеу жұмыстарында пайдаланылатын болады.
