MILSET EXPO-Sciences Vostok 2022 халықаралық көрмесі

2022 жылы 26 қыркүйек пен 2 қазан аралығында «Тұран» университетінде (Қазақстан, Алматы қ.) MILSET EXPO-Sciences Vostok 2022 жастардың ғылыми-техникалық шығармашылығының Халықаралық көрмесі өтті.

Көрме әлемнің 90-нан астам еліндегі ғылыми қауымдастықтарды, ұйымдарды, орталықтарды, клубтарды, мұражайларды біріктіретін MILSET (Mouvement International pour le Loisir Scientifique et Technique) жастардың ғылыми-техникалық шығармашылығы халықаралық қозғалысының бағдарламасы шеңберінде ұйымдастырылған. Көрмені өткізу форматы – офлайн және онлайн.

«Тұран» инновациялық-кәсіпкерлік университеті МИЛСЕТ Шығыс Атқарушы комитетінің шешіміне және МИЛСЕТ Бас Ассамблеясының ұсынымдарына сәйкес MILSET Expo-Sciences Vostok көрмесінің өтетін орны болып белгіленді (Әбу-Даби қ., 24 қыркүйек 2019 ж.).

Қазақстан, Ресей, Қырғызстан, Беларусь, Португалия, Мексика, Сальвадор және басқа елдерден 12-25 жас аралығындағы жас зерттеушілер жаратылыстану ғылымдары, технологиялар, инженерлік өнер, көркем және әлеуметтік шығармашылық, математика салаларындағы жобаларды ұсынды. Көрмеге қатысушылар қатарында Алматы қаласының 9 мектебінен 26 оқушы бар, олар инновациялық ғылыми-техникалық және әлеуметтік жобаларды ұсынды, соның ішінде республикалық деңгейдегі конкурстарда жеңіске жеткендер.

Көрменің алты күндік мәдени-білім беру және іскерлік бағдарламасы іс-шараға қатысушылар мен қонақтарға инновациялық жобалармен танысуға, тәжірибе алмасуға, ғылым мен мәдениет саласындағы заманауи жетістіктерді талқылауға мүмкіндік берді.

Көрме аясында milset Бас Ассамблеясы, ғылыми жетекшілерге арналған Leader Congress, қатысушыларға арналған ғылыми коммуникация бойынша мастер-класс, сондай-ақ Young Citizens Conference – ғарышты игерудің жаһандық мәселелері туралы конференция-пікірталас өтті.

Көрме Қазақстан Республикасы Ғылым және жоғары білім министрлігінің, Қазақстан Республикасы Білім Министрлігінің, Алматы қаласы әкімдігі мен білім басқармасының, «Алматы дарыны» дарынды балалар мен дарынды жастарды анықтау және Қолдау Орталығының қолдауымен өткізілді.

Көрме туралы ақпарат ресми сайтта да орналастырылған, Facebook және Instagram әлеуметтік желілерде.