«Тұран» университеті Моңғолия серіктестерімен халықаралық ынтымақтастықты дамытуда
Моңғолияға жасалған халықаралық сапар және «Study in Kazakhstan» білім беру көрмесіне қатысу аясында «Тұран» университеті білім беру, туризм және кәсіби даму салаларындағы халықаралық серіктестермен өзара түсіністік және ынтымақтастық туралы бірқатар меморандумдарға қол қойды.
Сапардың маңызды оқиғаларының бірі – «Тұран» университеті мен Turan World LLC компаниясы арасындағы ынтымақтастық туралы меморандумға қол қойылуы болды. Тараптар бірлескен білім беру жобаларын дамыту, студенттерге арналған тағылымдамалар мен тәжірибелер ұйымдастыру, кәсіби және білім беру іс-шараларын өткізу, сондай-ақ білім алушылардың кәсіби дамуы мен жұмыспен қамтылуын қолдау бағытында ынтымақтастық орнатуға келісті.
Сонымен қатар сапар аясында «Тұран» университеті мен Fast Thinking LLC компаниясы арасында меморандумға қол қойылды. Құжат туризм, білім беру сервистері, конференциялар, бизнес-кездесулер және халықаралық кәсіби іс-шараларды ұйымдастыру салаларындағы ынтымақтастықты дамытуды көздейді. Turan World LLC және Fast Thinking LLC компанияларының бас директоры Ерболат Ашик мырза Ұланбатыр қаласы әкімінің және Моңғолия астанасы губернаторының білім беру мәселелері жөніндегі кеңесшісі қызметін де атқарады.
Қол қойылған келісімдер халықаралық серіктестікті нығайтуға, кәсіби тәжірибе алмасуға және академиялық әрі тәжірибеге бағытталған өзара іс-қимыл мүмкіндіктерін кеңейтуге бағытталған. Ынтымақтастық аясында компания өкілдерінің дәрістерге, семинарларға, тренингтерге және болашақ мамандарды даярлау сапасын арттыруға бағытталған бірлескен бастамаларға қатысуы жоспарлануда.
Сапар барысында Моңғолия өкілдерімен және халықаралық білім беру қауымдастығымен өткен кездесулер ерекше әсер қалдырды. Ең жарқын кездесулердің бірі Ерболат Ашиқпен өтті. Оның ашықтығы, энергиясы және халықаралық ынтымақтастықты дамытуға деген қызығушылығы екі ел арасындағы достық әрі кәсіби байланыстардың нығаюының символына айналды.
Халықаралық ынтымақтастық пен серіктестік желісін кеңейту «Тұран» университетінің интернационалдандыру стратегиясының маңызды бөлігі болып табылады. Моңғолияда қол қойылған меморандумдар университеттің халықаралық байланыстарын нығайтуға, академиялық ұтқырлықты дамытуға және студенттер мен оқытушылар үшін халықаралық деңгейде жаңа мүмкіндіктер қалыптастыруға бағытталған кезекті қадам болды.
