«Тұран» университетінде IT-сала сарапшыларының қонақ дәрістері өтті

2026 жылғы 16 сәуірде «Тұран» университетінің Ақпараттық технологиялар жоғары мектебінде жетекші халықаралық IT-компаниялар өкілдерінің қатысуымен қонақ дәрістері өтті.

Студенттер алдында шақырылған сарапшылар сөз сөйледі: Эдуард Лик – Halyk.Market компаниясының Senior/Lead Frontend Software Engineer және Karim Nauruzov – DataArt халықаралық компаниясының Senior Information Security Analyst маманы.

Эдуард Ликтің «Release Anatomy: From Folder to Deployment» атты дәрісі аясында бағдарламалық өнімнің өмірлік циклінің негізгі кезеңдері – әзірлеуден бастап релизге дейінгі үдерістер қарастырылды. Спикер командалық әзірлеу процестері, Git, code review, тестілеу және CI/CD құралдарын қолдану туралы, сондай-ақ код сапасын қамтамасыз ету мен автоматтандырылған релиздерді ұйымдастырудың практикалық аспектілері туралы жан-жақты баяндады.

Karim Nauruzov «Don’t Trust AI Code» атты дәрісін ұсынып, бағдарламалауда жасанды интеллект құралдарын қолдану кезіндегі ақпараттық қауіпсіздік мәселелеріне тоқталды. Ерекше назар AI-ассистенттер арқылы жасалған кодтағы тәуекелдерге және осалдықтарды анықтау әдістеріне аударылды. Сонымен қатар кездесу барысында студенттерге шетелдік университеттерде зерттеу тәжірибесін алуға мүмкіндік беретін IIPP халықаралық тағылымдама бағдарламасы таныстырылды.

Қонақ дәрістері студенттердің үлкен қызығушылығын тудырып, олардың IT-индустриядағы заманауи талаптар, өзекті технологиялар және кәсіби даму мүмкіндіктері туралы түсінігін кеңейтті.

Мұндай іс-шаралар университет пен индустрия арасындағы байланысты нығайтуға, сондай-ақ ақпараттық технологиялар саласында болашақ мамандарды даярлау сапасын арттыруға ықпал етеді.

Дәрістердің ұйымдастырушысы – техника ғылымдарының кандидаты, Ақпараттық технологиялар жоғары мектебінің қауымдастырылған профессоры Ким Екатерина Романовна.